'ദളപതി' വിജയ് ഇപ്പോൾ എച്ച്. വിനോദ് സംവിധാനം ചെയ്യുന്ന 'ജനനായകൻ' എന്ന ചിത്രത്തിലാണ്  അഭിനയിച്ചുകൊണ്ടിരിക്കുന്നത്.  ഇത് വിജയ്‌യുടെ അവസാനത്തെ ചിത്രമെന്നതിനാൽ  ചിത്രത്തെക്കുറിച്ചുള്ള പ്രതീക്ഷകൾ വളരെയധികമാണ്. തെലുങ്കിൽ ബാലകൃഷ്ണ അഭിനയിച്ച 'ഭഗവന്ത് കേസരി'യുടെ റീമേക്കായാണ് ഈ ചിത്രം  ഒരുങ്ങുന്നത് എന്നുള്ള റിപ്പോർട്ടുകൾ മുൻപ് പുറത്തുവന്നിരുന്നു.

എന്നാൽ ചിത്രത്തിന്റെ അണിയറപ്രവർത്തകർ ഈ വാർത്തയെ നിഷേധിക്കുകയോ വിശദീകരിക്കുകയോ ചെയ്തില്ല. എന്നാൽ ഇപ്പോൾ പുറത്തുവന്നിരിക്കുന്ന ഒരു വാർത്ത ബാലകൃഷ്ണ നായകനായി പുറത്തുവന്ന 'ഭഗവന്ത് കേസരി' എന്ന ചിത്രത്തിലെ ഒരു രംഗം 'ജനനായകൻ' സിനിമയിൽ അവതരിപ്പിക്കുന്നുണ്ട് എന്നുള്ളതാണ്.  ഇതിനായി 'ഭഗവന്ത് കേസരി'യുടെ മുഴുവൻ റീമേക്ക് അവകാശവും കരസ്ഥമാക്കിയാണത്രെ ആ രംഗം 'ജനനായകൻ' ചിത്രത്തിൽ അവതരിപ്പിക്കുന്നത്. ചിത്രത്തിന്റെ റിലീസ് സമയത്തിൽ എന്തെങ്കിലും പ്രശ്നങ്ങൾ ഉണ്ടാകാതിരിക്കാനാണ് ഇങ്ങിനെയൊരു മുൻകരുതൽ നടപടി സ്വീകരിച്ചിരിക്കുന്നത് എന്നും പറയപ്പെടുന്നുണ്ട്. . 

  'ഭഗവന്ത് കേസരി' ചിത്രത്തിൽ ഒരു സ്കൂൾ പരിപാടിയിൽ പങ്കെടുക്കുന്ന ബാലകൃഷ്ണ, പെൺകുട്ടികളെ 'നല്ല സ്പർശം, ചീത്ത സ്പർശം' (good tuch bad tuch)  എന്താണെന്ന് പഠിപ്പിക്കുന്നത് സംബന്ധമായ ഒരു രംഗമുണ്ടത്രെ! കുട്ടികൾക്കായുള്ള ഈ ബോധവൽക്കരണ പരിപാടിയെ നിരവധി പേർ അഭിനന്ദിക്കുകയും ചെയ്തുവത്രേ! ആ രംഗമാണത്രെ 'ജനനായകൻ' ചിത്രത്തിൽ റീമേക്ക് ചെയ്തിരിക്കുന്നത്. ഈ വാർത്ത ഇപ്പോൾ കോളിവുഡിൽ വൈറലായി കൊണ്ടിരിക്കുകയാണ്.