ബെംഗളൂരുവിലെ തെരുവിൽ തനിക്കും ബന്ധുവിനുമെതിരെ ഉണ്ടായ അതിക്രമത്തെക്കുറിച്ച് വെളിപ്പെടുത്തി കന്നഡ നടി ദിവ്യ സുരേഷ്. നഗരത്തിൽ സ്ത്രീകളുടെ സുരക്ഷയെ ചോദ്യം ചെയ്തുകൊണ്ട്, താൻ നേരിട്ട ദുരനുഭവം നടി സോഷ്യൽ മീഡിയയിലൂടെ പങ്കുവെക്കുകയായിരുന്നു. ഞായറാഴ്ച രാത്രി 11.30ഓടെയായിരുന്നു സംഭവം.

ദിവ്യയും ബന്ധുവായ യുവതിയും കാറിലേക്ക് നടന്നുപോകുന്നതിനിടെ അജ്ഞാതനായ ഒരാൾ ഇവരെ പിന്തുടർന്നെന്നാണ് നടിയുടെ ആരോപണം. ഇയാൾ അപമര്യാദയായി പെരുമാറുകയും അശ്ലീല ആംഗ്യങ്ങൾ കാണിക്കുകയും ചെയ്തതായി ദിവ്യ ഇൻസ്റ്റഗ്രാം സ്റ്റോറിയിൽ കുറിച്ചു. സംഭവത്തെ ചോദ്യം ചെയ്തിട്ടും ഇയാൾ പിന്മാറാൻ തയ്യാറായില്ലെന്നും, ഇരുവരും കാറിൽ കയറി സുരക്ഷിതരാകുന്നതുവരെ ശല്യം തുടർന്നുവെന്നും അവർ വ്യക്തമാക്കി.

"രാത്രിയിൽ പുറത്തിറങ്ങി നടക്കുന്നതിന്റെ പേരിൽ ഒരു സ്ത്രീയും ഇത്തരത്തിലുള്ള അനുഭവങ്ങൾ നേരിടേണ്ടി വരരുത്," എന്ന് ദിവ്യ കുറിച്ചു. ബെംഗളൂരു പോലീസിനെ ടാഗ് ചെയ്തുകൊണ്ട്, "ഞങ്ങൾക്ക് വാഗ്ദാനം ചെയ്ത സുരക്ഷ എവിടെയാണ്?" എന്നും അവർ ചോദിച്ചു.

സംഭവത്തിന്റെ വീഡിയോയും ദിവ്യ സമൂഹമാധ്യമങ്ങളിൽ പങ്കുവെച്ചിട്ടുണ്ട്. കാറിൽ കയറി വാതിലുകൾ പൂട്ടിയ ശേഷവും ഇയാൾ അതിക്രമം തുടർന്നതായി വീഡിയോയിൽ കാണാം. ഒപ്പമുണ്ടായിരുന്ന ബന്ധു പോലീസിനെ വിളിക്കാൻ ആവശ്യപ്പെടുന്നതും, ആ വ്യക്തിയുടെ മോശം പെരുമാറ്റത്തെക്കുറിച്ച് പ്രതികരിക്കുന്നതും ദൃശ്യങ്ങളിലുണ്ട്. കാറിനുള്ളിലായ ശേഷവും ഇയാൾ തങ്ങളെ പിന്തുടർന്നതായി ദിവ്യ വീഡിയോയിൽ പറയുന്നുണ്ട്.

2021-ൽ കളേഴ്സ് കന്നഡയിലെ ബിഗ് ബോസ് കന്നഡ സീസൺ 8-ൽ മത്സരാർത്ഥിയായതോടെയാണ് ദിവ്യ സുരേഷ് കൂടുതൽ ശ്രദ്ധ നേടിയത്. നന്നാ ഹെൻതി എംബിബിഎസ്, ജോഡി ഹക്കി എന്നീ സീരിയലുകളിലും അവർ അഭിനയിച്ചിട്ടുണ്ട്. മോഡലിംഗ് രംഗത്തുനിന്ന് അഭിനയത്തിലേക്ക് എത്തിയ ദിവ്യ, 2017-ൽ മിസ് ഇന്ത്യ സൗത്ത് കിരീടം നേടിയിരുന്നു. അതേ വർഷം #9 എന്ന ചിത്രത്തിലും ഹിൽട്ടൺ ക്രോസ് എന്ന സിനിമയിലൂടെയും അഭിനയരംഗത്ത് അരങ്ങേറ്റം കുറിച്ചു. റൗഡി ബേബി, കംപു ഹലാദി ഹസിരു, ഹിരണ്യ എന്നിവയാണ് മറ്റ് ശ്രദ്ധേയ ചിത്രങ്ങൾ.