മലയാള സിനിമയിലെ എക്കാലത്തെയും പ്രിയപ്പെട്ട കൂട്ടുകെട്ടായ മോഹൻലാലും സത്യൻ അന്തിക്കാടും വീണ്ടും ഒന്നിക്കുന്നു. സൂപ്പർഹിറ്റ് ചിത്രം 'ഹൃദയപൂർവ്വ'ത്തിന് ശേഷം സത്യൻ അന്തിക്കാട് സംവിധാനം ചെയ്യുന്ന പുതിയ ചിത്രത്തിൽ മോഹൻലാൽ ഒരു അദ്ധ്യാപകന്റെ വേഷത്തിലാണ് എത്തുന്നത്. ചിത്രത്തിന് 'ഗുരുനാഥൻ' എന്ന പേരിടാനാണ് അണിയറപ്രവർത്തകർ ആലോചിക്കുന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ഈ ചിത്രം മോഹൻലാലിന്റെ അടുത്ത വർഷത്തെ ഏറ്റവും പ്രധാനപ്പെട്ട പ്രോജക്ടുകളിൽ ഒന്നായിരിക്കും.
​നിലവിൽ തരുൺ മൂർത്തി സംവിധാനം ചെയ്യുന്ന 'അതിമനോഹരം' എന്ന സിനിമയുടെ ചിത്രീകരണ തിരക്കുകളിലാണ് മോഹൻലാൽ. കൊച്ചിയിൽ ഈ ചിത്രത്തിന്റെ ഷൂട്ടിംഗ് പുരോഗമിക്കുകയാണ്.

​ബിഗ് ബഡ്ജറ്റിൽ 'നെടുങ്കണ്ടം മിറക്കിൾ'

​'അതിമനോഹര'ത്തിന് ശേഷം ദിലീഷ് പോത്തൻ സംവിധാനം ചെയ്യുന്ന 'നെടുങ്കണ്ടം മിറക്കിൾ' എന്ന ചിത്രത്തിലാണ് മോഹൻലാൽ ജോയിൻ ചെയ്യുക. നവംബറിൽ ചിത്രീകരണം ആരംഭിക്കുന്ന ഈ സിനിമയിൽ മോഹൻലാലിനൊപ്പം യുവതാരം ആസിഫ് അലിയും ഒരു പ്രധാന വേഷത്തിൽ എത്തുന്നുണ്ട്. മോഹൻലാൽ, ദിലീഷ് പോത്തൻ, ശ്യാം പുഷ്കരൻ എന്നിവർ ആദ്യമായി ഒന്നിക്കുന്ന ചിത്രം കൂടിയാണിത്.

​ചിത്രത്തിന്റെ അണിയറപ്രവർത്തകർ

​തിരക്കഥ: ശ്യാം പുഷ്കരൻ, പോൾസൺ സ്കറിയ
​ഛായാഗ്രഹണം: ഷൈജു ഖാലിദ്
​സംഗീതം: സുഷിൻ ശ്യാം
​എഡിറ്റിംഗ്: സൈജു ശ്രീധരൻ
​പ്രൊഡക്ഷൻ ഡിസൈൻ: അജയൻ ചാലിശ്ശേരി
​കോസ്റ്റ്യൂം: മഷർ ഹംസ
​മേക്കപ്പ്: റോണക്സ് സേവ്യർ

​ജോൺ മേരി ക്രിയേറ്റീവിന്റെ ബാനറിൽ അപ്പു ബേബി ജോൺ ആണ് ചിത്രം നിർമ്മിക്കുന്നത്. തിരുവനന്തപുരം, ഇടുക്കി, ചെന്നൈ എന്നിവിടങ്ങളിലായി ചിത്രീകരിക്കുന്ന സിനിമ തിയേറ്ററുകളിൽ എത്തിക്കുന്നത് ഭാവന റിലീസ് ആണ്.
​ഇവയ്ക്ക് പുറമേ വിഷ്ണു മോഹൻ, മേജർ രവി എന്നിവരുടെ പുതിയ ചിത്രങ്ങളും മോഹൻലാലിന്റേതായി വരാനിരിക്കുന്നുണ്ട്. ബിഗ് ബജറ്റ് ചിത്രങ്ങളും മികച്ച ക്രാഫ്റ്റുള്ള സംവിധായകരുടെ സിനിമകളുമായി വരും വർഷം മോഹൻലാൽ ആരാധകർക്ക് വലിയൊരു വിരുന്ന് തന്നെയായിരിക്കും സമ്മാനിക്കുക.