തമിഴ് സിനിമയിലെ പ്രശസ്ത ഹാസ്യ നടനായ 'യോഗി'  ബാബു ചില ചിത്രങ്ങളിൽ കഥയുടെ നായകനായും അഭിനയിച്ചിട്ടുണ്ട്.  ഇദ്ദേഹം കഥയുടെ നായകനായി 11 കഥാപാത്രങ്ങളിൽ അഭിനയിക്കുന്ന ഒരു സിനിമ തമിഴിൽ ഒരുങ്ങിവരുന്നുണ്ട്. നവാഗത സംവിധായകനായ ആർ.കിഷോർ കുമാർ സംവിധാനം ചെയ്യുന്ന ഈ ചിത്രം ഒരു പാൻ ഇന്ത്യൻ സിനിമയായി പുറത്തുവരുമെന്നാണ് റിപ്പോർട്ട്.   കോമഡി, ആക്ഷൻ, ത്രില്ലർ ജോണറിൽ രൂപം കൊള്ളുന്ന ഈ ചിത്രത്തിൽ യോഗി ബാബുവിനൊപ്പം  മലയാളി നടിയായ അതിഥി രവി, റെഡിൻ കിംഗ്സ്ലി, വി.ടി.വി.ഗണേഷ്, പഞ്ചു സുബു, ഇ.വെങ്കിടേഷ് തുടങ്ങിയ താരങ്ങളും അണിനിരക്കുന്നുണ്ട്. സംവിധായകൻ മോഹൻ രാജക്കൊപ്പം സഹസംവിധായകനായി പ്രവർത്തിച്ച വ്യക്തിയാണ് ആർ.കിഷോർ കുമാർ. ഒരു സൈനിക ഹെലികാപ്റ്റർ അപകടത്തിൽ പെടുന്നതിനെ തുടർന്ന് ആ അപകട കാരണത്തെ കണ്ടെത്താൻ  നായകൻ അഭിമുഖീകരിക്കുന്ന വെല്ലുവിളികളായ സംഭവങ്ങളാണത്രെ ചിത്രത്തിന്റെ തിരക്കഥ! ഇനിയും പേരിടാത്ത ഈ ചിത്രം അഥിതി രവി അഭിനയിക്കുന്ന രണ്ടാമത്തെ  തമിഴ് സിനിമയാണ്. ഇംഗ്ലണ്ട്, കെനിയ എന്നീ രാജ്യങ്ങളിലും ഈ ചിത്രത്തിന്റെ ചിത്രീകരണം നടക്കാനിരിക്കുകയാണ്!